محشى السبيط بالجمبرى اللذيذ فى الفرن

قدمى السبيط بطريقة مختلفة وشهية هتحبيها جدااا ,

قدميها على سفرة المأكولات البحرية مع الجمبرى المشوى واستمتعى بأحلى طعم

المقادير:
4 حبات سبيط
كوب أرز مسلوق أو مطبوخ
بصلة مفرومة
2 فص ثوم مفروم
حبة فلفل أحمر مفرومة
حبة فلفل أخضر مفرومة
1/ 2 كوب كزبرة مفروم
1/ 4 كيلو جمبري صغير
3 ملاعق كبيرة زيت
ملح وفلفل
ملعقة صغيرة كمون وكزبرة ناشفة و كركم

طريقة التحضير:
قومى بوضع الزيت في طاسة، وشوّحي فيه البصل والثوم، وقلبيهم لمدة دقيقتين، بعدين ضيفي عليه الجمبري وشوّحيه شوية، وضيفي الفلفل الألوان والكزبرة.

بعد كده ضيفى الأرز وقلبيه مع الخليط، وتبليهم بالملح والفلفل والكمون وكزبرة ناشفة والكركم.

و اغسلي السبيط كويس، وابدئي احشيه بالخليط، وممكن بعد ما تحشيه تقفليه بخِلّة، أو ممكن تسيبيه مفتوح ومع التسوية هيقفل لوحده.

ثم ضعيه في حلة، وتكوني مقطعة فيها شرايح جزر وكرفس وبصل، وبعدين ضعى عليهم السبيط، وحطي معاه 3/ 4 كوب مياه أو شوربة، وغطي الحلة وسيبيه يستوي على نار هادية.

بعد ما السبيط يستوي طلعيه من الحلة، وحطّيه في صينية، وخدي جزء من السائل المتبقي من سلق السبيط وحطّيه على السبيط، وبعدين دخليه الفرن لمدة 10 دقائق لحد ما يبقى لونه دهبي.

بعد ما تطلعيه من الفرن قطعيه نصفين، ورصّيه في طبق التقديم مع باقي كمية الحشوة اللي جهزتيها، وتكون سخنة، وقدميه..
وبالصحة والهنا,,,

إقتراح التقديم:

قدمى محشى السبيط

مع شوربة السمك بالطماطم والتوابل