طريقة عمل كفتة الدجاج المحشية بالمشروم والجبن

طريقة عمل كفتة الدجاج المحشية بالمشروم والجبن مفيش أسهل منها ولا أحلى من طعمها يمكنك تقديمها فى كل الأوقات على الغداء أو العشاء زى ماتحبى … ابدعى وتفننى وقدمى كل جديد وشهى … طبقنا غير مكلف على قد مصروف البيت
يلا بسرعة نشوف وصفتنا حصريا على وصفات أكل عربية

المقادير:

4 صدور دجاج
ملعقة صغيرة زعتر
ملعقة صغيرة كزبرة
ملعقة صغيرة حبهان مطحون
ثمرة بطاطس متوسّطة
ملح وفلفل أسود

*للحشو:

10 مكعبات جبنة كريمي (ممكن تستخدمي جبنة نستو أو شيدر)
2 ملعقة كبيرة بقدونس مفروم
½ كوب مشروم مفروم

*للتغطية:

2 بيضة
2 كوب بقسماط ناعم
½ ملعقة صغيرة ملح
رشة فلفل أسود
زيت ذرة للقلي

كفتة الدجاج المحشية بالمشروم والجبن

طريقة التحضير:

اسلقي البطاطس نصف سوى وقطّعيها شرائح، وسيبيها لحد ما تبرد تماما.

 افرمي صدور الدجاج وشرائح البطاطس مع بعض في المفرمة، وبعد كده تبّليها بالملح والفلفل والكزبرة والزعتر والحبهان، واعجني الخليط كله بإيدك كويس.

*الحشو:

اخلطي المشروم مع الجبنة والبقدونس، وقلّبيهم مع بعض كويس.

 خدي كمية مناسبة من الكفتة وافرديها على إيدك، واحشيها بكمية مناسبة من الحشو، ولفّيها على شكل صوابع، وكرّري الخطوة دي لغاية ما كل الكمية تخلص.

اخفقي البيض في طبق وحطي عليه الملح والفلفل، وحطّي أصابع الكفتة في البيض وبعد كده في البقسماط.

 حمّري الكفتة في زيت ساخن وغزير، وبعد كده طلّعيها على مناديل ورقية علشان تتشرّب الزيت، وعند التقديم زيّنيها بالبقدونس..

وبالصحة والهنا…

إقتراح التقديم:

قدمى الكفتة الشهية مع حساء الدجاج بالجبنة