ساندويتشات الكبدة الشهية

بتحبى ساندويتشات الكبدة وبتخافى تشتريها جاهزة …
النهاردة هتقدرى تعمليها من صنع ايديكى طعم ولا فى الخيال وكمان مضمونة…
قدمى لأسرتك كل اللى بتحبيه من غير قلق.

المقادير:

كيلو كبدة مقطعة قطع متوسطة الحجم
2 ثمرة بصل مقطعة قطع متوسطة الحجم
ثمرة فلفل رومي كبيرة مقطعة مكعبات متوسطة الحجم
ثمرة طماطم صغيرة مقطعة مكعبات متوسطة الحجم
3 فصوص ثوم مقطّعين قطع صغيرة
½ ملعقة صغيرة شطة حمراء
4 ملعقة كبيرة عصير ليمون
ملعقة كبيرة بهارات لحمة
2 فص ثوم مفروم
ملعقة كبيرة زبدة
ملح وفلفل أسود

طريقة التحضير:

1- لتجهيز تتبيلة الكبدة، اخلطي نص كمية البصل اللي عندك مع الملح والفلفل الأسود والبهارات وعصير الليمون.

2- ضيفي الخليط السابق على الكبدة وقلّبيهم كلهم مع بعض كويس، وسيبيها لمدة ساعة في التلاجة علشان الكبدة تشرّب من التتبيلة كويس.

3- شوّحي باقي كمية البصل اللي عندك مع الزبدة على النار لمدة 5 دقائق، وبعد كده ضيفي عليها الكبدة، وقلّبيهم كلهم مع بعض لمدة 5 دقائق.

4- بعد كده ضيفي باقي المقادير اللي عندك وقلبيهم كلهم مع بعض لمدة ربع ساعة أو لغاية ما تلاقي إن الكبدة نزّلت الميه اللي فيها وشربتها تاني، وبعد كده حطّي الكبدة في الساندويتشات
وبالصحة والهنا,,,