جمبرى بالصلصة والخضراوات

جمبرى بالصلصة والخضراوات
لكل اللى بيحبوا الجمبرى ، هقدم النهاردة طريقة لذية جدا وسهلة وخفيفة ، تعالى معايا نجربها ونعمل طبق جديد يضيف لسفرتك طعم مميز ومختلف ، تعالى جربيه وقولى رأيك فيه .

المقادير:
½ كيلو جمبري بالقشر
½ كوب صلصة طماطم
ثمرة بصل متوسطة مقطّعة شرائح رفيعة
2 ثمرة فلفل ألوان مقطّعة شرائح رفيعة
قرن فلفل حامي مقطّع شرائح رفيعة
ثمرة كوسة مقطّع شرائح رفيعة
ثمرة جزر مقطّعة شرائح رفيعة
2 ملعقة زيت زيتون
ملعقة صغيرة كمون
2 عود كرفس مفروم
ملعقة صغيرة زعتر
2 فص ثوم مفروم
ثمرة بطاطس
ملح وفلفل

طريقة التحضير:
1- شوّحي البصل والثوم في ملعقة كبيرة زيت على النار لحد ما يبقى لونهم ذهبي، وبعد كده ضيفي عليهم الكرفس والزعتر وقلّبيهم مع بعض شوية على النار.

2- ضيفي الجزر والفلفل والبطاطس والكوسة والفلفل الحامي على البصل، وشوّحيهم مع بعض لحد ما الخضار يبقى نصف سوى.

3- بعد كده حطّي عليهم الجمبري، وتبّليهم بالملح والفلفل والكمون، وبعدين ضيفي عصير الطماطم، وقلّبيهم على النار لمدة 5 دقائق.

4- افردي ورق فويل في صينية، واقلبي عليه الجمبري بالخضراوات وضيفي عليهم ربع كوب ميه أو صلصة طماطم، وبعدين اقفلي الفويل عليه.

5- دخّلي الصينية في الفرن لمدة 10 دقائق، وبعدين طلّعيها واغرفي الجمبري في طبق التقديم.
وبالصحة والهنا…