الدجاج المقرمش بالسمسم والبقسماط

الدجاج المقرمش بالسمسم والبقسماط

تعالى أقولك على طريقة لتقديم صدور الدجاج بطعم لذيذ جدااا وفى نفس الوقت سهلة التحضير, أهم شئ انك تكونى محضرة مكونات الوصفة من قبلها حتى تأخذ وقتها فى التتبيل
جربيها هتعجبك جداااا

المقاديـر:

كيلو صدور دجاج
1/2 حزمة بقدونس مقطعة قطعاً صغيرة
بصلة مقطعة قطعاً صغيرة
5 فصوص ثوم مفروم
1/4 كوب كبير طحينة
ملح وفلفل
كوب زبادي كبير
معلقة كبيرة سمسم (محمص)
1/2 كوب دقيق
1/2 كوب بقسماط
زيت للقلي

طريقة التحضير:
1- اغسلي صدور الدجاج كويس، وبعد كده حطيها في مصفاة، واعملي فتحات في صدور الدجاج بالسكينة زي اللي بتتعمل في السندويشات.

2- اخلطي البقدونس مع البصل والثوم والطحينة والملح والفلفل وقلبيهم مع بعض كويس.

3- احشي صدور الدجاج بالخليط السابق اللي إنت عملتيه، واقفلي عليهم بأعواد خشبية (علشان الحشو ما يطلعش لبره).

4- غطي صدور الدجاج من جميع الجهات بالزبادي.

5- اخلطي السمسم المحمص مع الدقيق مع البقسماط كويس، وضيفي ليهم الملح والفلفل.

6- غطي صدور الدجاج بالخليط السابق من جميع الجوانب، وحطيها في الثلاجة لمدة نص ساعة.

7- بعد مرور النص ساعة سخني الزيت كويس، وحمري فيه صدور الدجاج لغاية لونها ما يبقى ذهبي.

8- بعد ما تخلصي تحمير صدور الدجاج حطيها على ورق زبدة علشان يمتصّ الزيت الزائد.

9- بعد كده سخني الفرن على درجة حرارة متوسطة، ودخليها الفرن لمدة ربع ساعة، وبعد كده خرجيها وحطيها في أطباق التقديم، وزيني الطبق بأوراق البقدونس.
وبالصحة والهنا,,,

إقتراح التقديم:
قدمى طبق اليوم مع مكرونة بالصوص الأبيض والجبن الشيدر